Dispensasjonar for produksjonstilskot

Fylkesmannen kan gi dispensasjon når det vil vere urimeleg at søkjar ikkje kan gis tilskot, for eksempel i ein oppstartperiode. Søkjar skal sende søknad om dispensasjon til kommunen som gir uttale i saka og sender saksdokumenta over til Fylkesmannen for avgjerd. Det skal i kvart enkelt tilfelle vurderast om det ligg føre tilstrekkelege grunnar til å innvilge dispensasjon eller ikkje. Statens landbruksforvaltning er klageinstans.

• Det kan gis dispensasjon frå kravet til ein omsetnad på kr 20.000,-. Dersom ein søkjar på registreringsdato har tilstrekkeleg med areal og/eller dyr til at han vil koma opp i ein omsetnad på minimum kr 20.000,- gjennom sal av slakt, mjølk, korn, frukt, bær osv., vil det vere rimeleg å innvilge dispensasjon. Dei fleste dispensasjonssøknadene gjeld omsetningskravet.
• Det kan gis dispensasjon frå søknadsfristen når forhold utanfor søkjar sin kontroll kan føre til at søkjar ikkje er blitt registrert som føretak i Einingsregisteret innan søknadsfristen. Det vil for eksempel vere rimeleg å gi dispensasjon til føretak som har søkt om registrering i Einingsregisteret i rimeleg tid før søknadsfristen. Søkjar må kunne dokumentera at registreringsmelding er sendt til Einingsregisteret i rimeleg tid før søknadsfristen.
• Det skal ikkje gis dispensasjon dersom søkjar har gløymt å sende inn søknaden, har reist på ferie osv.
• Det skal ikkje gis dispensasjon fordi søkjar hevdar at han ikkje kjenner til reglane i forskrifta. Det er søkjar sitt eige ansvar å halde seg oppdatert om dei til ei kvar tid gjeldande reglane.
• Det skal ikkje gis varige dispensasjonar.