Vegen mot nullutsleppsamfunnet- Klimakur 2030

Klimakur 2030 har vore ute på høyring, kor det er framlegg om fleire tiltak for å redusera kvotepliktige utslepp med 50 % i 2030 samanlikna med 2005. Det ligg i korta til Klimakur 2030 at me får ein strengare klimapolitikk på fleire område. Utredninga skal brukas som underlag for å utarbeida ein plan for korleis vi skal oppfylle Norges klimaforpliktingar i 2030 når ein avtale med EU om felles oppfyllingar er på plass.

Prioritering av klimakutt-tiltak

Det er nemnd 13 særleg viktige klimatiltak tiltak i samandraget (sjå side 29 i samandragsrapporten). Vi vil særleg framheve:

• Satsing på maritim sektor og vidareutvikling av energi- og utleppsvenlege fartøy innan både ferje, hurtigbåt, fritidsbåt, suppley og lastefartøy som eit særleg viktig område for Noreg å stimulere til.
• Vidare må redusert forbruk, god ressursøkonomi inkludert berekraftig arealbruk vektleggjast sterkt.
• Kommune, stat og offentleg eigde selskap må gå føre i eige bygging og drift inkludert innkjøpssamanheng for å stimulere til teknologiutvikling og sirkulasjonsøkonomi.

Landbruk

Jordbruk
Logisk nok har me gitt jordbruk ein del merksemd i vår uttale. I matfylket Rogaland er det særleg viktig å legge vekt på tiltak som vidareutviklar eit berekraftig landbruk utan å svekke sjølvforsyningsgraden. Klimakuren må ta høgde for ein langsiktig god arealbruk. Ved så store kutt i produksjon av raudt kjøtt er det fleire ledd som påverkast, som beite, kulturlandskap og biomangfald. Ein reduksjon i tal beitedyr vil første og fremst ramme distrikta. Heilskaplege løysingar og endring i takt med næringa er viktig for å lykkast.

Skogbruk
Skogbruk har ei viktig rolle i klimasamanheng, og det er stort potensiale i auka karbonbinding i skogen langs kysten. Det er her viktig å legga til rette for norsk vidareforedling og sikker avsetning av produkta i ein norsk marknad. Der kan det offentlege gå føre i mykje større grad ved å prioritere bruk av tre i bygg og oppvarming med bioenergi.

Ikkje gløym økologisk berekraftig klimaomstilling

Forholdet mellom ivaretaking av urørt og semi-påverka natur, som er kloden sin buffer og reperasjonsevne for klimaendringar, må vektast høgt. Noreg har mykje natur og me kan i vår tilnærming synast noko heimeblinde og utskjemde ovafor dei naturlege økosystema sine tenester for folk og samfunn. Ikkje-fornybare naturressursar må forvaltast i eit langt perspektiv og slik at samfunnet ikkje vert for avhengig av dei. Og utvinning må ikkje skape nye problem, slik som klimagassar og miljøgifter.