Kumlokket. Ordføraren. Fylkesmannen.
Forvirra? Ikkje så rart. For kva er grunnen til at Gjesdal-ordførar Frode Fjeldsbø kom til Statens Hus for å overrekkja Fylkesmannen eit kumlokk i dag? Her er forklaringa.
Dette innholdet er mer enn ett år gammelt. Informasjonen kan derfor være utdatert.
– Bakgrunnen er ei synfaring i Gjesdal for nokre år sidan. Då oppdaga eg dette lokale kumlokket dei har fått laga. Eg fall pladask, det er det finaste kumlokket i landet, seier ein oppglødd fylkesmiljøvernsjef, May Britt Jensen, hos Fylkesmannen i Rogaland.
Komplisert sak
Synfaringa var i samband med ei plansak som viste seg å vera vrien. Kommunen lova at dersom samarbeidet med Fylkesmannen enda med ein godkjent plan, skulle kommunen gi eit kumlokk i gåve. Det blei vel ikkje oppfatta heilt bokstaveleg, men Gjesdal står for det dei lovar.
Tida gjekk
Samarbeidet var godt - og er godt. Motsegner blei løyste og planen vedtatt. Tida gjekk. Men kor blei det av kumlokket? Under Fylkesmannen sitt kommunebesøk i Gjesdal 25. februar, blei det mimra rundt kumlokk-lovnaden. Var han gløymt? Nei, slett ikkje. I dag kom Gjesdal-ordførar Frode Fjeldsbø med kumlokket personleg. Slett ikkje verst!
Korfor edderkopp?
Som du kanskje ser på biletet under, er motivet ein edderkopp, nærare bestemt ei vevkjerring – med klar referanse til tekstilindustrien som prega Ålgård, kommunesenteret i Gjesdal, frå slutten av 1800-talet.
Tusen takk!
