Kurs i økonomisk rådgjeving i 2021

Koronapandemien held fram med å utfordre privatøkonomien til innbyggjarane i Noreg på fleire måtar. Det går fram av SIFO-rapport 12-2020, som ser på den økonomiske tryggleiken for norske hushald i perioden april til juni 2020, at ein av fire hushald er ramma økonomisk av koronapandemien. Tiltaka knytt til koronapandemien held fram i ulik grad rundt om i landet, og det er grunn til å tru at dei økonomiske problema for dei som var ramma i 2020 vil halde fram i 2021 og at fleire kan verte ramma.

Økonomisk rådgjeving er ei lovpålagd individuell teneste etter sosialtenestelova paragraf 17. Tenesta er ei av kjerneoppgåvene i Nav-kontoret, og tilsette i Nav treng kunnskap om tenesta og aktuelle tema for å kunne gi råd og rettleiing, og for å kunne vidareformidle personar med større problem til ein spesialist innan økonomisk rådgjeving. 

For å hjelpe Nav-kontora og samarbeidande tenester i jobben med å rettleie privatpersonar om økonomi, tilbyr Statsforvaltaren kurs i økonomisk rådgjeving.

Kurstilbodet for økonomisk rådgjeving

Vi tilbyr tre typar kurs innan økonomisk rådgjeving: basiskurs, grunnkurs og vidaregåande kurs.

• Basiskurset er eit helt grunnleggjande kurs for Nav-tilsette som skal hjelpe personar som kan ha eller står i fare for å få økonomiske problem, og for tilsette i som samhandlar med Nav, til dømes barnevern, rus og psykiatri, helse, buoppfølging med vidare.
• Grunnkurset er eit grunnleggjande kurs for tilsette i Nav som arbeider med å hjelpe personar med økonomiske vanskar.
• Det vidaregåande kurset er eit kurs for deg som er tilsett som økonomisk rådgjevar eller gjeldsrådgjevar i Nav.

Kurs våren 2021

Følg lenkjene til dei ulike kursa for meir informasjon:

• Digitalt grunnkurs i økonomisk rådgjeving 20-21. april 2021
• Digitalt grunnkurs i økonomisk rådgjeving 10-11. mai 2021
• Digitalt vidaregåande kurs i økonomisk rådgjeving 8-9. juni 2021

På noverande tidspunkt er det ikkje satt dato for basiskurs våren 2021 for Vestland. Vi kjem tilbake med meir informasjon når eventuelle datoar er klare.

Grunn- og vidaregåande kurs vert arrangert av Statsforvalteren i Trøndelag og Statsforvaltaren i Vestland i samarbeid med Statsforvalteren i Troms og Finnmark, Statsforvalteren i Nordland, Statsforvaltaren i Møre og Romsdal og Statsforvaltaren i Rogaland. Nav-tilsette i alle seks fylka kan delta.