Helsepersonell må journalføre tillitsskapande tiltak og bruk av tvang

Helsepersonell kan bruke pasient- og brukarrettslova kapittel 4A for å gjere vedtak om tvungen somatisk helsehjelp til personar utan samtykkekompetanse som motset seg helsehjelpa. Statsforvaltaren skal etterkontrollere vedtak som varer i meir enn tre månader, jf. pasient- og brukarrettslova § 4A-8. Til kontrollen hentar vi inn oppdaterte opplysingar og journalutskrift frå helsetenesta.

Ifølge helsepersonellova § 39 skal den som yter helsehjelp, journalføre opplysingar som er relevante og naudsynte om pasienten og helsehjelpa.

Dette betyr at helsepersonell som yter helsehjelp, må dokumentere både bruk av tvang og tillitsskapande tiltak. Vi har frå tid til annan sett at opplysingane i journalen er mangelfulle på dette området. Då kan vi ikkje kontrollere om vilkåra i lova er oppfylte. Viss journalutskrifta vi får frå helsetenesta ikkje inneheld opplysingar om tvangsbruk og tillitsskapande tiltak, kan Statsforvaltaren måtte oppheve vedtaket. Manglande journalføring kan føre til at det ikkje blir oppdaga ulovleg tvang mot pasientar eller at pasientane ikkje får den helsehjelpa dei har krav på.