Matbyen Bergen med vestlandsk ost til Italia

Utanom vår heimlege verdsmeister frå 2018, vellagra «Fanaost» frå Ostegården, er dei noko spesielle, men svært tradisjonstunge ostane våre plukka ut til å representere regionen i Bergamo. Brun geitost frå Undredal og Gamalost frå Vik (TINE) er begge svært særmerkte ostetypar, med hundrevis av år med historie bak seg. Og tru det eller ei: italienarane kjenner også til surmjølksostar som gamalost, t.d. den tyrolske «graukäse» frå naboprovinsen Trentino.

Bergen kommune har vore medlem av UNESCO Creative Cities Network i kategorien Gastronomi, eller matkultur, sidan 2015. Fylkeskommunen og Fylkesmannen set pris på deltakinga i utviklingssamarbeidet knytt til Matbyen, også fordi dette kan fungere som eit lokomotiv for utvikling i heile regionen. Kultur- og erfaringsutveksling er eit viktig føremål med nettverket, og med denne deltakinga får både byen og regionen høve til å bygge matidentitet til kultur- og reiselivsprofileringa si.

Den regionale partnarskapen ser deltakinga som eit bidrag til definisjon av vår felles matidentitet, der bergensmarknaden er ein viktig, kommersiell drivar for at også andre stader og område i Vestland skal ta eigarskap til sine lokale spesialitetar, tradisjonar og mathistorier.

Forme Creative 2020

Bergamo er, som Bergen, både UNESCO verdsarv- og matby. Vi har såleis mykje til felles, når det gjeld erfaring og moglegheiter for implementering av kultur og historie i nærings- og reiselivsutvikling. Byen og provinsen er, i tillegg, eit tyngdepunkt for handverksost, og nyttar dette som hovudtema for medlemskapen sin, under namn som Bergamo Cheese Valley.

Arrangementet består av ein UNESCO matby-konferanse (Summit), ei virtuell utstilling, ein ostelab, og eit Cheese Forum. Alle desse vert streama, og kan vere verd å få med seg for alle som er interessert i, eller arbeider med, ost, lokal matidentitet, reiseliv og innovasjon her heime.

Her finst tema som:

• ost og mat som kulturarv
• område, kultur og lokale produkt som strategiske ressursar i profilering
• matturisme: stader som destinasjonar og lokalprodukt som ambassadørar
• innovasjon, internasjonalisering, netthandel og marknadsplassar

Bergen som motor for utvikling av identitetsmat i Vestland

Vi har i noko tid sett at bergensmarknaden har fungert som ein kommersiell drivar innanfor lokalmat i Vestland, mellom anna i utviklinga innan sider og bær, der Bergen har vore «den store heimemarknaden» for vestlendingane. Samstundes har restaurantnæringa i byen vore ein kulturell drivar for å fremje og bruke lokalmat, i møte med lokale produsentar frå store delar av fylket. Det store, regionale reiselivet har også i aukande grad adoptert mat som ein del av historia om Bergen og fjordane.

Vi har tiltru til at både denne deltakinga og andre aktivitetar i regi av Matbyen Bergen bidreg til å setje fokus på eigen matkultur, også i andre delar av fylket.

Partnarskapen vil særleg takke Aud Slettehaug ved Kompetansenettverket for lokalmat (Vest) ved Sogn Jord- og Hagebruksskule, som har vore avgjerande for å få organisert alt rundt dei deltakande ostane på kort varsel.

Lenkjer:

Interesserte frå publikum, fag og næring innan ost, lokalmat, gastronomi og reiseliv kan følgje Forme Creative 2020 her: https://www.progettoforme.eu/en/ 

International Summit “Food. Restart from Creativity” vert streama på Comune di Bergamo sin Youtube-kanal fredag 20. november kl 14.30: https://www.youtube.com/user/comunebg

Den virtuelle utstillinga av ostar frå UNESCO-byane finn du her:
https://www.progettoforme.eu/en/creative-cheese-expo/

Informasjon om UNESCO-nettverket finn du her: https://en.unesco.org/creative-cities/home
Her fin du informasjon om Bergen si UNESCO satsing her: https://bergenmatby.com/