Areálahálddašeapmi
Fylkkamánnis leat guokte váldobarggu, mat laktásit gielddaid areálahálddašeapmái:
- Fylkkamánni lea eanandoalu, birasgáhttema, dearvvašvuođa ja servodatsihkkarvuođa fágaeiseváldi, ja galgá fuolahit das, ahte nationála beroštumit váldojuvvojit vuhtii.
- Fylkkamánni galgá sihkkarastit, ahte gielddat čuvvot gustovaš lágaid go dat mearridit plána- ja huksenáššiid.
Gielda dat dábálaččat ieš mearrida mo geavaha areálaid, nu guhká go dat ii rihko nationála politihka rámmaid.
Stuorradiggi ja ráđđehus nannejit njuolggadusaid ja rámmaid, maid vuođul gielddat hálddašit areálaid. Fylkkamánni bargun lea fuolahit, ahte gielddat váldet vuhtii nationála beroštumiid birasgáhttema, eanandoalu, dearvvašvuođa ja servodatsihkarvuođa suorggis. Jos gieldda areálahálddašeapmi rihkku nationála beroštumiid, de Fylkkamánni galgá dahkat juoidá.
Fylkkamánni sáhttá vuosttaldit dahje almmuhit, ahte áigu vuosttaldit, areálaplána dahje váidalit huksenášši mearrádusa (sierralobi mearrádusa), mii rihkku areálaplána. Jos gielda vállje leat vuhtiiválddekeahttá vuosttaldeami, de oasálaččat galget soabadallat. Jos ášši ii čoavdás soabadallamiin, de gielda sáhttá dáhttut sáddet ášši Birasgáhttendepartementii, mii mearrida ášši loahpalaččat.
Dat, geaidda gusket gieldda muddenplána ja huksenáššiid mearrádusat dahje mearrádusat, mat leat dahkkojuvvon eananlága, konsešuvdnalága ja árbevuoigatvuođalága (odellága) vuođul, sáhttet váidalit mearrádusaid Fylkkadiggái. Fylkkamánni meannuda maid váidalusáššiid, main mearrádusa vuođđun lea matrihkalláhka, oamastansekšuvdnaláhka, viessosadjeláigoláhka ja láhka, mii válddahallá gielddaid ovdavuoigatvuođa oastima oktavuođas. Fylkkamánni lea maid váidalaninstánsa áššiin, main almmolašvuohta váldá badjelasas priváhta opmodaga plána- ja huksenlága vuođul (bággolonistemiin). Dakkár áššiid váidalusa meannuda vuos gielda. Jos gielda ii váldde vuhtii váidalusa, de dat sádde váidalusa Fylkkamánnii, mii mearrida ášši loahpalaččat.