Vuodjinkoarta
Go dus lea vuodjinkoarta, don beasat vuodjit mohtorfievrruin, mii gullá ovtta dahje máŋgga vuodjinkoartaluohkkái. Buohkat, geat cevzet vuodjiniskosis ja devdet dearvvašvuođa ja meannudusgáibádusaid, sáhttet oažžut vuodjinkoartta.
Du ovddasvástádus lea vuodjit sihkkarit
Jos it leat sihkar das, sáhtátgo vuodjit sihkkarit dearvvašvuođaváttisvuođaid dahje dálkasiid geavaheami geažil, de lea du geatnegasvuohta fitnat doaktára luhtte. Jos doavttir, psykologa dahje optihkar oaivvilda, ahte vuodjinkoartta dearvvašvuođagáibádusat eai dieva, de son galgá almmuhit das Fylkkamánnii. Fylkkamánni almmuha politiijai, jos vuodjinkoartta galgá bearrat ruovttoluotta ollásit dahje muhtin muddui.
Don sáhtát ohcat vuodjinkoartta máhcaheami
Don sáhtát ohcat politiijas dahje Fylkkamánnis vuodjinkoartta máhcaheami. Vuodjinkoartta sáhttet máhcahit, jos fas deavddát dearvvašvuođagáibádusaid.
Don sáhtát ohcat spiehkasteami dearvvašvuođagáibádusain
Don sáhtát ohcat Fylkkamánnis spiehkasteami dearvvašvuođagáibádusain. Ohcamuššii don čálát guđe vuodjinkoartaluohkás lea sáhka ja man láhkai don dárbbašat vuodjinkoartta.
- Bija ohcamuša mielddusin doaktárduođaštusa, mii válddáhallá dan dearvvašvuođaváilli, mas lea sáhka.
- Bija maid mielddusin vuodjinkoartta ohcamuša doaktárduođaštusa skovi (”Legeattest ved søknad om førerkort” (Stáhta geaidnodoaimmahat, NA 0202) maid doai fástadoaktáriinnát leahppi deavdán ovttas.
- Jos dus lea sohkardávda, bija mielddusin skovi NA0202b, maid doai fástadoaktáriinnát leahppi deavdán ovttas.
- Jos ozat spiehkasteami dálkasiid geavaheami vuođul, de fertet maid bidjat kopiija dálkasiid čálalaš diŋgomiin, maid du doavttir lea čállán maŋimuš 6 mánu.
- Don sáhtát bidjat mielddusin duođaštusa iežat bargoaddis.
Mađe buorebut du ohcamuš lea vuođuštuvvon, dađe álkit Fylkkamánnii lea mearridit ášši riekta ja meannudit ášši johtilit.
Fylkkamánni meannuda spiehkastemiid ja vuodjinkoarttaid máhcahanohcamušaid. Dearvvašvuođadirektoráhtta fas lea váidalaninstánsa. Jos du lihkadannávccat leat bistevaččat rievdan, de Stáhta geaidnodoaimmahat meannuda du ohcamuša.