Fylhkenålma edtja nasjovnaale ålkoejieledeiedtjh gorredih mah leah gaedtiebealan, tjaetsieåeriej jïh vaeriej bïjre. Fylhkenålma lea regijovnale tjïrkije staaten goh dajveaajhtere dejnie gorredamme ålkoejielededajvine.
Dovne Fylhkenålma, fylhkentjïelte jïh tjïelth edtjieh krööhkedh sïejhme almetji nuepiem ålkoejieledem nåhtadidh, gosse aamhtesh gïetedieh arealenuhtjemen bïjre. Fylhkentjïelte maahta dåarjoem vedtedh råajvarimmide mah skreejrieh ålkoejieledisnie meatan årrodh, jïh gorredidh jïh orre ålkoejielededajvh darjodh.
Vijreme jïh gööleme
Gaajhkh vijrh leah vaarjelamme jis ij maam akt jeatjebem laakine jallh jïjtse nænnoestimmine nænnoestamme. Direktovraate eatnemereeremasse vijremetïjjen nænnoste ovmessie aarhtide, men tjïelte maahta guhkiedidh jallh åeniedidh vijremetïjjem muvhtide aarhtide. Tjïelte mahte abpe reeremedïedtem vijri åvteste åtna, mejtie maahta vuetjedh. Fylhkentjïelte edtja tjïeltide bïhkedidh gaajhki aarhti bïjre mejtie maahta vuetjedh, bielelen gedtie.
Fylhkenålma klååkemefaamoem åtna.
Fylhkenålman aaj dïedte loesem, mearoedååpmehkem jïh prååsehke såarhth jaevrieguelijste reeredh. Fylhkenålman aaj dïedte gaajhki guelieaarhti åvteste tjaetsiestuvrehtimmien sjïekenisnie.
Fylhkenålma statistihkem tjöönghkie loese- jïh mearoedååpmehkegöölemistie, vïhtesjadta man gellie mah meatan orreme mearoeloesegöölemisnie jïh dåarjoem staateles gueliefoenteste joekede. Vååksjedimmie vihkeles jis edtja buektiehtidh guelieveahkide gorredidh jïh lissiehtidh. Fylhkenålma lïhke gaskesem åtna dajveaajhterigujmie jïh vijreme- jïh göölemetjiertigujmie, jïh aktem lïhke laavenjostoem åtna pollisinie, Staaten eatnemevaaksjoeminie jïh Mearoegaedtievaeptine juktie guelievierhtide vååksjedidh.
Eatnemereeremen direktovraate dïedtem åtna gueliestuvrehtimmiej åvteste jeanojne jïh mearosne, jïh mieriedimmieh dorje göölemasse loeseste jïh mearoedååpmehkistie.
Fylhkentjïelte dïedtem åtna jaevriegueliej åvteste, mah eah leah håvhtadihks. Fylhkentjïelte aaj dïedtem åtna gueliebïepmehtimmiekonsesjovnide joekedidh.