Suohkana bargo
Divna suohkanijn mánájsuodjalusdievnastus galggá årrot, mij bæjválasj bargov mánájsuodjaluslága milta dåjmat. Mánájsuodjalusdievnastus galggá viehkkedåjmat mánnáj ja berrahij álgadit. Viehkev máhttá rádij ja bagádallamij baktu vaddet, ja jus soajttá kombinasjåvnån ietjá viehkkedåjmaj. Dábálasj viehkkedåjma li, duola degu mánájgárddesadje, oatsodiddje, ráde ja bagádallama ja gæhpádisdåjma sijdan.
Mánájsuodjalusdievnastusán la aj åvdåsvásstádus gasskaj mannat, jus dåjma sijdan ælla nuohkása máná dárbojt várajda válldet. Mánájsuodjalusdievnastus dalloj máhttá, muhtem ájggáj, aktanrádijn æjgádij sajev gávnnat biebbmosijdan jali ásadusán, jali æjgádij ja mánáj guovdátjin. Jus mánná galggá sijda ålgusjbælláj biejaduvvat æjgádij sidoda dagi, de bierri mierredus dan birra dagáduvvat Mánájsuodjalusá ja sosiála ássjij fylkanammadusán suohkana oajvvadusá milta.
Mánájsuodjalusá ja sosiála ássjij fylkanammadus
Mánájsuodjalusá ja sosiála ássjij fylkanammadusán la viellde mierredusájt dahkat duola degu huksobadjelválldema ássjijn ja ássjijn ma guosski bággodåjmajda nuoraj hárráj, gejn li duodalasj ulmutjahttemgássjelisvuoda. Fylkanammadusá mierredusájt máhttá duobbmoståvlåj åvddåj buktet.
Fylkamánne bærrájgæhttjá ja le gujddiminstánssa
Fylkamánne bærrájgæhttjá suohkana mánájsuodjalusdåjmav. Dat mierkki duola degu Fylkamánne gujddimijt giehtadallá, ma guosski mánájsuodjalusá ássjegiehtadallamij ja merustallá jus mánájsuodjalusdievnastus la ietjas bargov dahkam mánájsuodjaluslága ja háldadimlága milta.
Fylkamánne le aj gujddiminstánssa ájnegasjmierredusájda majt mánájsuodjalusdievnastus la dahkam mánájsuodjaluslága milta. Ienemus bálijn la sáhka ássjij birra, gånnå máná jali æjgáda gujddiji sij ælla oadtjum dajt viehkkedåjmajt majt li sávvam oadtjot.
Fylkamánne aj bærrájgæhttjá mánájt mánájsuodjalusásadusájn, vaj sij oadtju bælostahtte huvsov ja buorre sujtov. Bærrájgæhttje aj galggá åtsådit jus máná sujttiduvvi vieledusájn ja respektajn ájnegasj máná integritehta åvdås. Dat mierkki duola degu jus mánná le bággiduvvum mánájsuodjalusásadusán, de mánná máhttá gujddit Fylkamánnáj.