Ájnas la suohkanij iesjmierredibme ja bájkálasj demokratija, li dássásattja nasjonálalasj avtalágásjvuodaprinsihpajn ja riektásihkarvuodajn, ma galggi fármastit divna rijka viesádijt.
Fylkamánnen la viellde åtsådit suohkanij dåjmajt. Gålmmå jali ienebuv suohkanstivrraájrrasijs máhtti aktan rádjat mierredusáv Fylkamánnáj, vaj dat luluj åtsådit jus mierredus la lágalasj. Fylkamánne máhttá aj ietjas álgadimijn åtsådit ássjij lágalasjvuodav. Fylkamánne åtsåt jus mierredus la lágalattjat dagádum, jus riekta orgádna le mierredusáv dahkam, ja jus mierredusá sisadno tjuovvu guoskavasj lágajt ja njuolgadusájt.