Har du behov for helsehjelp når du er på hytta i sommar?

Statsforvaltaren får kvar sommar spørsmål frå personar som treng helsehjelp frå kommunen når dei skal feriere på hytta. Har du dei same rettane på hytta som heime?

Eit sørga for-ansvar

Kommunen har ei plikt til å sørga for at alle som oppheld seg i kommunen får nødvendige helsetenester. Det er behovet ditt som avgjer kva kommunen er forplikta til å yte i den enkelte sak. Dette sørga for-ansvaret gjeld og for ferierande som oppheld seg i kommunen i ein avgrensa periode. Avhengig av kva type helsehjelp du treng, kan kommunen krevja ei viss lengd på opphaldet før plikta til å yta tenester trer inn.

Har du krav på dei same tenestene som heime?

Kva tenester kommunen er plikta til å yta feriegjester, er avhengig av hjelpebehovet og lengda på opphaldet. Det vil i nokre tilfelle vera forsvarleg med eit mindre omfang av tenester enn det du får i heimkommunen. Nokre av tenestene du har heime, vil du i ein kortare periode kunne klara deg utan, sjølv om det ikkje er forsvarleg over ein lengre periode.

Kommunen må vurdera kvar sak individuelt

Etter helse- og omsorgstenestelova er det opphaldsprinsippet som gjeld. Ved avslag på søknad om tenester, kan ikkje kommunen grunngi avslaget med at vedkommande ikkje bur i kommunen. Kommunen må ta utgangspunkt i kva hjelpebehov den enkelte har og gjera ei individuell vurdering. Det må òg gå fram i avslaget, kvifor vedkomande ikkje får dei tenestene vedkomande har søkt om.