Kartlegging av fuktskog i Vestland 2022

Oppdraget

Vi har, på oppdrag frå Miljødirektoratet, foreslått område for kartlegging av fuktskog i fylket. Miljødirektoratet har brukt forslaga frå oss som grunnlag for å prioritere kva område som skal kartleggast i 2022.

Tjue område spreidd over heile fylket

Som del av kunnskapsbehovet i skogvernarbeidet blir det gjennomført systematiske kartleggingar av viktige skogtypar. Det er tidlegare gjennomført kartlegging av m.a. kystfuruskog, edellauvskog, bekkekløfter og kalkskog. Det blir no arbeidd med ei systematisk kartlegging av fuktskog.

Tjue område er plukka ut for kartlegging i Vestland. Områda ligg spreidd over heile fylket, og dekkjer til saman 11 790 dekar. Gjennomsnittleg storleik på kartleggingsområda er 590 daa. Områda er plukka ut ved hjelp av topografiske kart, flyfoto og kart over markfukt, og det er ikkje gitt at ein finn den aktuelle skogtypen i alle områda.

Kartlegginga blir utført av ein biolog på oppdrag for Miljødirektoratet. Aktuelle kommunar har blitt informert om kartlegginga.

Føremål

Føremålet med kartlegginga er å få betre og meir nøyaktig oversikt over område med verdifull natur, mellom anna til bruk i kommunen si arealplanlegging eller som grunnlag for frivillig skogvern. 

Metode

Kartlegginga skjer etter NiN-systemet (Natur i Norge), eit standardisert system for kartlegging av natur i Norge. Miljødirektoratet har vurdert 109 naturtypar som særleg viktige for naturmangfaldet og som derfor skal kartleggast. Dei fleste av desse er raudlista i Norge, medan andre er viktige leveområde for truga og nær truga artar.

Resultata frå kartlegginga vil etter kvart bli allment tilgjengelege i Naturbase

Ferdsel på innmark

All ferdsel i samband med kartlegginga vil skje i tråd med friluftslova sine reglar om ferdsel og god ferdselskultur.

Kart over einskilde område for kartlegging