Statsforvaltaren i Vestland tilrår regional koronaforskrift i bergensområdet

Lengde på tiltaka

Vi meiner at forskrifta bør vare til og med 7. januar både fordi det trengst tid for å vurdere effekten av forskrifta og fordi det i julehøgtida er auka mobilitet i befolkninga som forhøgar risikoen for smittespreiing. I første arbeidsveka i januar må det gjerast ei vurdering om forlenging eller ikkje.

Involvering viss situasjonen endrar seg andre stadar

Viss smittesituasjonen andre stadar i landet skulle utvikle seg slik at det vert aktuelt med fleire innstrammingar i dei regionale forskriftene som er vedtekne nasjonalt gjennom covid-19-forskrifta, ønskjer vi å verte orienterte slik at vi kan gjere vurderingar om det er trong for tilsvarande tiltak i våre kommunar.
Vi tilrår å innføre regional forskrift i følgjande kommunar
Alver, Askøy, Austevoll, Austrheim, Bergen, Bjørnafjorden, Kvam, Osterøy, Modalen, Samnanger, Vaksdal, Voss og Øygarden.

Vi tilrår at forskrifta omfattar følgjande tiltak:

• Påbod om bruk av munnbind der det ikkje er mogleg å halde avstand innandørs i det offentlege rom og/eller på kollektivtransport.
• Påbod om at arbeidsgjevar syter for at tilsette i størst mogleg grad kan uføre arbeid utan auka risiko for smitte på arbeidsplassen, eller ved reiser med kollektivtransport til og frå arbeidsplassen.
• Avgrensingar i talet deltakarar på private arrangement.
• Plikt for serveringsstadar og arrangørar til å ha system for å registrere gjester og for å varsle gjester om smitteeksponering.
• Plikt til karantene fram til negativt prøvesvar på første test føreligg (ikkje berre ei tilråding som no) òg for born i skulealder som er husstandsmedlemer og tilsvarande nære til personar med påvist covid-19, uavhengig av vaksinasjonsstatus.

Vi ventar at Helsedepartementet i løpet av arbeidsdagen 03.12.2021 vil ta stilling til om forskrifta skal vedtakast.

Andre kommunar i føretaksområdet

Vi oppmodar dei andre kommunane i føretaksområdet om å følgje tett opp smittesituasjonen i eigen kommune, og kontinuerleg vurdere trongen for forsterka tilrådingar og tiltak. Det gjeld følgjande kommunar: Eidfjord, Fedje, Gulen, Masfjorden, og Ulvik.

Nødvendige tiltak

Både kommunane og helseføretaka har gitt ei tydeleg tilbakemelding om at presset på tenestene er svært stort. Vi meiner at tiltaka er nødvendige for å halde kontroll på pandemien i regionen, og unngå ein situasjon der det kan vere fare for at kommunane og sjukehusa misser evna til å levere kritiske tenester.

Vi meiner at tiltaka i seg sjølve er lite inngripande for born og unge, privatpersonar elles og næringslivet.