Tokkeåi naturreservat

Området har ein særskild pedagogisk og naturvitskapeleg verdi som eit av dei største registrerte kløftesystema i Noreg. Her finn ein uvanleg velutvikla neverlavsamfunn, rike samfunn av mikrolav på alm og mange sjeldne og trua artar.

Utvidingsområdet kring Berglibekken er prega av rike vegetasjonstypar med fleire varmekrevjande artar som er sjeldne så langt inn i landet. Området er eit "hotspot-område" for sjeldne og trua artar av særleg sopp, men òg karplanter, mosar og lav. Ein kan finne lågurt-eikeskog utanfor kløftesystemet.

Områda er verna for å ta vare på eit særmerkt skogområde med stor variasjon av element som er viktige for det biologiske mangfaldet, i form av eit stort samanhengande kløftesystem med variert topografi og sjeldne naturtypar som fuktige bergveggar og skogmiljø på rasmark, lavrik lauvskog med regnskogpreg og grunnlendte førekomstar av kalkbarskog.